കടലിളകുന്നു: അരുന്ധതിമധുമേഘ

കടലിളകുന്നു കണ്ണിൽ കത്തും
കനലുകളെരിയുന്നു
കാറ്റലറുന്നു  കടുംതുടി കൊട്ടി
തീമഴപെയ്യുന്നു

മേൽകോയ്മകളുടെ മേലാപ്പിൽ
ചുടുചോര തെറിക്കുമ്പോൾ
മേധാവികളുടെ നെഞ്ചിൻകൂട്
തൊഴിച്ചുതകർക്കും നാം

ഇന്നിവിടില്ല നാളെയീമണ്ണിൻ
ഉടയാളന്മാർ നാം
കവർന്നെടുത്തവയെല്ലാം
നമ്മുടെ നെഞ്ചിൻ നോവല്ലോ

തിരിച്ചെടുക്കും ഓരോന്നായി
ഹൃദയം വേവുമ്പോൾ
പിടിച്ചടുക്കും കെട്ടി മറച്ചു
പകുത്തുമാറ്റിയവ

അടിമകളല്ല പിറന്നമണ്ണിൽ
അവകാശികൾ ഞങ്ങൾ
അടിയറവില്ല തകർത്തുടയ്ക്കും
കൺമുമ്പിൽ തന്നെ
                                 
ജനിച്ച നാട്ടിൽ അഭയാർത്ഥികളായി
തരം തിരിക്കുമ്പോൾ
പിറന്ന മണ്ണിൻ അവകാശങ്ങൾ
പറിച്ചു മാറ്റുന്നു

തുടിച്ചുനിൽക്കും ഇന്നീമണ്ണിൻ
കരളിൻ തുടി ഞങ്ങൾ
തുടച്ചുമായ്ക്കാൻ കഴിയില്ലല്ലോ
കരുത്തിനടയാളം

ചവിട്ടി നിൽക്കാൻ ഇടം തരാതെ പിടിച്ചുതള്ളുമ്പോൾ
പുറത്തിറങ്ങാൻ വഴിയില്ലാതെ
കൊട്ടിയടച്ചപ്പോൾ

എരിഞ്ഞു കത്തും ഉടലും മനസ്സും
ഉലയിൽ ഉരുകുമ്പോൾ
രാകിമിനുക്കി ആയുധമാക്കി
മൂർച്ചകൾ കൂട്ടും നാം

കഴുത്തറുത്ത് ചുട്ടുകരിച്ച്
തലകളെടുക്കുമ്പോൾ
മരിച്ചവർ നാം പുനർജ്ജ്നിക്കും
തിരിച്ചറിവോടെ

ഉദിച്ചു വാഴും ഉടലാഴങ്ങളിൽ
സൂര്യൻന്മാരായ് നാം
കത്തി ജ്വലിക്കും ഉയിരുകൾ നമ്മൾ
പൊരുതുക പോരുകളായി
       ....                 ...          ............